༄༅། །ཕྱི་ལོ་ ༢༠༡༢ ཟླ་ ༤ ཚེས་ ༥ རེས་གཟའ་ལྷག་པའི་ཉིན་ཕྱི་དྲིལ་དྲ་བརྙན་ཚན་པའི་གསར་འགོད་པ་རྣམ་རྒྱལ་ཚེ་དབང་ གིས་བཏང་གནས་ནང་འཁོད་དོན། བཀའ་ཁྲི་བློ་བཟང་སེང་གེ་མཆོག་གིས་ཆབ་སྲིད་ཚོགས་པ་ཁག་ལྔ་ནས་ཕེབས་པའི་ཉི་ཧོང་ གྲོས་ཚོགས་འཐུས་མི་དྲུག་ཅུ་དང༌། སྐུ་ཚབ་ ༣༥ བཅས་ལ་ཉི་འོང་གྲོས་ཚོགས་ལས་ཁུངས་ཤིག་གི་ནང་བོད་ནང་ཛ་དྲག་གི་གནས་སྟངས་སྐོར་ ཞིབ་ཕྲ་གསལ་བཤད་གནང་རྗེས་། གྲོས་ཚོགས་འཐུས་མི་རྣམས་ཀྱིས་ཉེ་ལམ་བོད་ནང་དུ་བོད་མི་ཚོས་བསྟུད་མར་རང་ལུས་ མེར་སྲེག་བཏང་བའི་རྒྱུ་རྐྱེན་གཙོ་བོ་རྒྱ་ནག་གཞུང་གིས་བོད་མིའི་ཐོག་དམ་ བསྒྲགས་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པའི་རྐྱེན་གྱིས་རེད། དེར་བརྟེན་ད་ཆ་རྒྱ་ནག་གཞུང་གིས་བོད་མིའི་ཐོག་འཛིན་བཞིན་པའི་དམ་བསྒྲགས་ཅན་ གྱི་སྲིད་བྱུས་དེར་བསྐྱར་ཞིབ་བྱེད་དགོས་པའི་དུས་ལ་བབ་ཡོད་པ་མ་ཟད། བོད་མིའི་འགྲོ་བ་མིའི་ཐོབ་ཐང་ལ་གུས་བརྩི་ཞུས་པའི་ཐོག་ནས་འཆམ་མཐུན་གྱི་སྤྱི་ ཚོགས་ཤིག་སྐྲུན་ཐུབ་པ་བྱུང་ཚེ་ཉི་ཧོང་དང་རྒྱ་ནག་དབར་གྱི་འབྲེལ་བ་དེ་ཡང་དོན་ སྙིང་ལྡན་པ་ཞིག་ཆགས་རྒྱུར་ང་ཚོས་རེ་བ་བྱེད་ཆོག ཅེས་སོགས་དགོས་འདུན་དོན་ཚན་ལྔ་ཅན་གྱི་གྲོས་ཆོད་ཅིག་བཞག་ཡོད།

དེ་ཡང་གྲོས་ཆོད་དེའི་ནང་འཁོད་དོན།
༡༽ང་ཚོས་བོད་ནང་ཕྱི་ལོ་ ༢༠༡༡ ཟླ་ ༣ པ་ནས་བཟུང་རང་ལུས་མེར་སྲེག་གཏོང་མཁན་མུ་མཐུད་ཡོང་བཞིན་པའི་དོན་རྐྱེན་དེར་ སེམས་འཚབ་ཆེན་པོ་ཡོད། བོད་མི་ཚོས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན་གཙོ་བོ་ནི་བོད་ མིའི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་དམ་བསྒྲགས་བྱས་པ་དེས་ཡིན། དེར་བརྟེན་སྲིད་བྱུས་དེར་བསྐྱར་ཞིབ་ནན་པོ་ཞིག་བྱེད་དགོས་པའི་སྐུལ་མ་ཞུ་ རྒྱུ་ཡིན། བོད་མིའི་གཞི་རྩའི་རང་དབང་དང༌། དགོན་སྡེ་ཁག་གི་ནང་དམག་དཔུང་ཕོན་ཆེ་འགྲེམས་འཇོག་བྱས་པ། དེ་བཞིན་རྒྱལ་གཅེས་ཆོས་གཅེས་ཟེར་བའི་ལས་འགུལ་སོགས་ཀྱི་སྲིད་བྱུས་ལ་བསྐྱར་ ཞིབ་བྱ་རྒྱུ།

༢༽རྒྱ་ ནག་གཞུང་གིས་ད་བར་བོད་མི་རང་ལུས་མེར་སྲེག་གཏོང་མཁན་གྱི་དགེ་འདུན་པ་དང༌། སྐྱ་བོ་འཛིན་བཟུང་བྱས་པ་རྣམས་ཀྱི་གནས་སྟངས་ཇི་ཡིན་གསལ་པོ་བཟོ་དགོས་པ།

༣༽རྒྱ་ནག་གཞུང་ནས་ཕྱི་ལོ་ ༢༠༠༨ ལོར་བོད་ནང་ཞི་རྒོལ་བྱུང་རྗེས་གསར་འགོད་པ་དང༌། ཕྱི་རྒྱལ་མི་སྣ་བོད་ནང་བསྐྱོད་རྒྱུར་བཀག་འགོག་བྱེད་བཞིན་པ་དེར་ངོ་རྒོལ་ གྱིས་བོད་ནང་གསར་འགོད་རང་དབང་དང༌། འགྲོ་བསྐྱོད་རང་དབང༌སྤྲོད་དགོས་པའི་སྐུལ་མ་ཞུ་རྒྱུ་ཡིན།

༤༽རྒྱ་ནག་གཞུང་གིས་བཙན་བྱོལ་བོད་གཞུང་དང་ཐད་ཀར་འབྲེལ་ལམ་སྐྱར་གསོ་གནང་ སྟེ་དོན་ཕན་ལྡན་པའི་འབྲེལ་མོལ་གང་མགྱོགས་འགོ་འཛུགས་བྱ་རྒྱུའི་ལས་གཞིའི་ཐོག་ འབད་བརྩོན་གནང་རོགས་ཞེས་སྐུལ་མ་ཞུ་རྒྱུ།
མ་ཟད།

༥༽རྒྱ་ནག་གཞུང་ནས་བོད་ནང་རྒྱལ་སྤྱིའི་ཆོས་དད་རང་དབང་དང་འགྲོ་བ་མིའི་ཐོབ་ ཐང་གི་དམིགས་བསལ་རྟོག་ཞིབ་མི་སྣ་གཟིགས་སྐོར་ཡོང་ཆེད་འབོད་སྐུལ་ཞུས་པ་དེར་ དང་ལེན་གནང་སྟེ་བོད་མིའི་འགྲོ་བ་མིའི་ཐོབ་ཐང་ལ་དམ་བསྒྲགས་བྱེད་རྒྱུ་འཕྲལ་ མར་མཚམ་འཇོག་བྱེད་དགོས། ཞེས་སོགས་འཁོད་ཡོད།

དེ་ ཡང་གནད་དོན་དེའི་ཐོག་ཉི་ཧོང་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་ཉི་ ཧོང་ནང་ད་བར་གྲོས་ཚོགས་འཐུས་མི་ཕོན་ཆེན་པོ་དེ་འདྲ་ལྷན་འཛོམས་གནང་སྟེ་བོད་ དོན་ཐོག་སེམས་འཁུར་ཆེན་པོས་བགྲོ་གླེང་གནང་བ་མ་ཟད། གྲོས་ཆོད་ཀྱང་བཞག་ཐུབ་པ་འདི་ནི་ཉི་ཧོང་ལོ་རྒྱུས་ནང་ཐེངས་དང་པོ་ཆགས་ཡོད། དེར་བརྟེན་ད་ཐེངས་ལས་འགུལ་དེས་འབྱུང་འགྱུར་བོད་མིའི་འཐབ་རྩོད་ལ་རྒྱབ་སྐྱོར་ ཞུ་རྒྱུའི་ས་བོན་ཞིག་བཏབ་ཐུབ་པ་བྱུང་ཡོད། ཅེས་འགྲེལ་བརྗོད་གནང་ཡོད། ཕྱོགས་མཚུངས་སྐབས་དེར་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་གིས་བོད་ ནང་གི་ཛ་དྲག་གནས་སྟངས་དང་འབྲེལ་བའི་ཐོག་གྲོས་ཚོགས་འཐུས་མི་ཚོ་གཙོ་བོར་གྱུར་ བའི་སྐུ་ཚབ་འཐུས་མི་རྣམས་ཀྱི་་དྲི་བར་ལན་འདེབས་ཁ་གསལ་གནང་ཡོད། དེ་ཉིན་སྔ་དྲོར་བཀའ་ཁྲི་མཆོག་དང་ཉི་འོང་གྲོས་ཚོགས་འཐུས་མི་ཁག་གཅིག་ལྷན་དུ་ ཞོགས་ཟས་བཞེས་གནང་ཡོད་པ་མ་ཟད། དེ་ཉིན་ཕྱི་དྲོར་བཀའ་བློན་ཁྲི་པ་མཆོག་གིས་བོད་ནང་གི་ཁོར་ཡུག་གནས་སྟངས་སྐོར་ གསུང་བཤད་གནང་ཡོད་པ་བཅས།།

གནས་ཚུལ་འབྱུང་ཁུངས། དབུས་བོད་མིའི་སྒྲིག་འཛུགས་ཀྱི་དྲ་ཚིགས།

This entry was posted on Thursday, April 5th, 2012 at 4:15 pm and is filed under གསར་འགྱུར་།, བོད་. You can follow any responses to this entry through the RSS 2.0 feed. You can leave a response, or trackback from your own site.